Frouljus PC en NK Fierljeppen op Omrop Fryslân
Live te folgjen op woansdei 22 en sneon 25 augustus op radio, tv en Omroplive.nl
Omrop Fryslân hat ek de kommende wike wer in soad oandacht foar Fryske sporten. Sa wurdt woansdei de Frouljus PC keatst yn Weidum en is sneon de dei fan it NK Fierljeppen yn Drylts. Beide eveneminten binne live te folgjen by Omrop Fryslân.
Woansdei 22 augustus is de dei fan de 36e Frouljus PC; de wichtichste keatspartij foar froulju. Omrop Fryslân bringt de Frouljus PC yn Weidum wiidweidich by jo thús. De wedstriiddei is fan 11:00 oere ôf te folgjen op Omrop Fryslân Radio mei live ferslach fan keatskenner Geert van Tuinen en op Omroplive.nl mei live kommentaar fan ferslachjouwer Roelof de Vries en njoggenfâldich PC-winner Géjanna Buma. De bylden binne fan 13:00 oere ôf ek op Omrop Fryslân Televyzje te sjen (mei radio-lûd). Hokker partoer wint dizze PC en wa folget Fenna Zeinstra op as keninginne?